Arsenal staðfestir brottför Henry til Barcelona

Enska úrvalsdeildarfélagið Arsenal tilkynnti formlega í morgun að það hefði náð samkomulagi við spænska stórveldið Barcelona um sölu á framherjanum Thierry Henry. Talið er að kaupverðið sé um 16 milljónir punda og mun sá franski líklega skrifa undir fjögurra ára samning við Barca á mánudaginn ef hann lýkur læknisskoðun.

Henry staðfesti brottför sína frá Arsenal í samtali við The Sun í dag þar sem henn segir að brottför David Dein og yfirvofandi brottför Arsene Wenger knattspyrnustjóra hafi orðið til þess að hann ákvað að breyta til - 29 ára að aldri.

"Arsene hefur verið partur af mínu lífi síðan ég man eftir mér en hann hefur enn ekki fengist til að framlengja samning sinn við Arsenal lengur en út næsta ár. Ég virði þá ákvörðun hans en þá yrði ég orðinn 31 árs gamall og ég er ekki tilbúinn að taka áhættuna á því að vera hér þegar bæði Wenger og Dein eru farnir," sagði Henry og bætti við að það væri erfitt að fara frá Arsenal.

"Þetta er mín ákvörðun frá a til ö og enginn hafði áhrif á það að ég vildi fara með beinum hætti. Mér fannst ég verða að breyta til núna," sagði hann og bætti við að sér hefði staðið til boða að fara til annara liða - en Barcelona hafi lokkað sig til sín. "Barcelona er frábært félag með mikla hefð og spilar frábæra knattspyrnu. Ég er viss um að ég á eftir að verða hamingjusamur þar, en ég á líka eftir að sakna stuðningsmanna Arsenal gríðarlega. Þeir munu alltaf verða í hjarta mínu og hafa stutt við bakið á mér í gegn um sætt og súrt. Ég mun því alltaf eiga sérstakt samband við Arsenal," sagði Henry.

Talsmaður Arsenal og fyrrum fyrirliði liðsins, Frank McLintock, sagði eðlilegt að Henry byggði ákvörðun sína að nokkru leiti á framtíð Arsene Wenger, en sagðist ekki kaupa það að brottför David Dein hefði áhrif á að Henry væri að fara. "Ég hef aldrei heyrt svona tal áður og ég skil ekki að maður í stjórn félagsins á að hafa áhrif á það hvernig knattspyrnumaður stendur sig," sagði hann. "Hann er hinsvegar líklega besti leikmaður sem spilað hefur fyrir félagið og gaf okkur 5-6 frábær ár, svo hans verður saknað og hann á skilið að fara með góðu."

Henry hóf feril sinn sem vængmaður með Mónakó árið 1994 undir stjórn Arsene Wenger og var í heimsmeistaraliði Frakka árið 1998. Hann gekk í raðir Juventus það ár en náði sér aldrei á strik á Ítalíu. Ferill hans komst hinsvegar fljótt á rétta braut eftir að hann gekk til liðs við lið Wengers hjá Arsenal þar sem hann hefur tvímannalaust verið einn allra besti knattspyrnumaður heims síðustu ár.

Hann vann tvo deildarmeistaratitla með Arsenal, þrjá bikartitla og fleytti liðinu í úrslit Evrópukeppni félagsliða árið 2000 og Meistaradeildarinnar árið 2006. Hann varð fyrsti Arsenal-maðurinn til að skora yfir 200 mörk í febrúar árið 2006 og skoraði 226 mörk í 364 leikjum fyrir félagið. Hann hefur fjórum sinnum orðið markakóngur á Englandi og hefur tvisvar verið kjörinn leikmaður ársins á Englandi. Hér fyrir neðan má sjá nokkrar eftirminnilegar myndir af Henry af glæsilegum ferli með Arsenal.