Kínverjar í stjörnustríð

Bandaríkin, Ástralía og Kanada hafa öll gagnrýnt nýjustu viðbótina við vopnabúr Kínverja, sem virðast vera að búa sig undir stjörnustríð. Tilraun sem Kínverjar gerðu í vikunni gekk út á það að skjóta niður gamlan veðurathugunargervihnött úti í geimnum.

Gagnrýnendurnir segja þetta ganga gegn almennri sátt um að friður skuli ríkja í geimnum, þangað eigi jarðnesk vopnabúr ekki að ná.

BBC fréttastofan segir frá því að búist sé við að Bretland, Suður-Kórea og Japan lýsi sig mótfallin tilraunum Kínverja á næstu dögum.

Enginn var í nokkurri hættu í þessari vopnatilraun, því gervihnattaeyðirinn lenti á skotmarkinu meira en 800 kílómetrum fyrir ofan yfirborð jarðar.