Samantekt: Knattspyrnumenn sem látast fyrir aldur fram

Tíðindi um að hinn 22 ára gamli Antonio Puerta hafi látið lífið í dag, eftir að hafa fengið hjartáfall í miðjum leik Sevilla og Getafé um helgina hefur skilið knattspyrnuheiminn eftir í uppnámi. Andlát Puerta er þó ekki það fyrsta síns eðlis. Eftirfarandi er samantekt af atvikum þar sem leikmenn láta lífið í þessari vinsælustu íþrótt heims.

Á gúst 1989 - Nígeríski landsliðsmaðurinn, Samuel Okwaraji, lést í landsleik gegn Angólu í undankeppni Heimsmeistaramótsins. Þegar tíu mínútur lifðu af leiknum féll Okwaraji til jarðar og lést vegna hjartabilunar.

September 1990 - Framherjinn Dave Longhurst hjá Cork City, féll til jarðar í leik gegn Lincoln City tveimur mínútum fyrir hálfleik. Leikurinn var flautaður af og Longhurst úrskurðaður látinn af völdum sjaldgæfs hjartasjúkdóms. Longhurst var 25 ára gamall.

Október 2002 - Brasilíski framherjinn Marcio Dos Santos lést aðeins nokkrum klukkustundum eftir að hann skoraði sigurmark fyrir lið sitt, Deportivo Wanka. Dos Santos var 28 ára og lést af völdum hjartaáfalls.

Júní 2003 - Eitt hræðilegasta atvik knattspyrnusögunnar átti sér stað í álfukeppninni þegar kamerúnski landsliðsmaðurinn Marc-Vivien Foe féll til jarðar í leik gegn Kólumbíu. Foe hljóp á miðjulínu vallarins þegar hann datt niður og var borinn af velli. Hann lést skömmu síðar. Leikurinn var sýndur í beinni útsendingu um allan heim, þar á meðal á Íslandi.

Júlí 2003 - Tvítugur Brasilíumaður, Maximiliano Patrick, lætur lífið á sjúkrahúsi eftir að hafa liðið illa á æfingu með liði sínu, Botafogo-Ribeirao Preto.

Janúar 2004 - Ungverski landsliðsmaðurinn Miklos Fehrer lætur lífið af völdum hjartaáfalls í miðjum leik Benfica og og Vitoria Guimaraes. Fehrer var 24 ára gamall.

Júní 2005 - Hugo Cunha, miðjumaður portúgalska liðsins Uniao Leiria, lætur lífið þegar hann spilaði fótbolta við vini sína. Cunha var 28 ára gamall.

Ágúst 2007 - Antonio Puerta fær hjartaáfall í fyrsta leik Sevilla á tímabilinu gegn Getafé. Puerta stóð upp skömmu síðar eftir að hafa fengið læknisaðstoð og gekk til búningsklefa þar sem aftur leið yfir hann og hann var fluttur á sjúkrahús þar sem hann lést þremur dögum síðar. Puerta var 22 ára gamall og átti von á barni með unnustu sinni.