Á fleygiferð í bíl í Illum

Stórverslunin Illum á Strikinu í Kaupmannahöfn hefur eflaust líkst tökustað kvikmyndar í gærkvöld þegar tveir menn óku bifreið inn í verslunina og reyndu að ræna skartgripadeildina þar.

Eftir því sem fram kemur á vef Berlingske Tidende óku mennirnir inn í gegnum einn innganginn að Illum á lítilli Mözdu snemma í gærkvöldi og reyndu að brjóta upp skartgripageymslu. Það tókst hins vegar ekki og stukku því mennirnir aftur upp í bílinn og héldu ferð sinni áfram um verslunina. Þeir óku svo á endanum í gegnum rúðu í hinum enda Illum þar sem bíllinn endaði á Hauser-torgi. Hlupu mennirnir þá upp í annan bíl og hurfu á braut.

Lögregla undrar sig á því hvers vegna mennirnir hafi reynt að ræna verslunina svo snemma kvölds en fjölmörg vitni urðu að atburðinum. Hins vegar gæti reynst erfitt að hafa upp á mönnunum þar sem þeir voru grímuklæddir.