Erfiðlega gengur að gangsetja

Ekki hafði enn tekist að ræsa vélarnar í stóru japönsku hvalveiðiskipi, Nisshin Maru, í gær en eldur kom upp í skipinu við Suðurskautslandið á föstudaginn í síðustu viku. Um 70 manns úr áhöfn skipsins eru enn um borð.

Umhverfisráðherra Nýja-Sjálands segir ólíklegt að heimild fáist til að draga skipið til hafnar þar. Hvalveiðar eru bannaðar á Nýja-Sjálandi og um borð í skipinu eru bæði dauðir hvalir og mikið magn af olíu, sem einhver hætta er á að geti lekið út.

Vélarbilunin hefur komið hvalveiðum Japana við Suðurskautslandið í uppnám. Á þessari vertíð var meiningin að veiða 945 hvali, en Nisshin Maru er eina skipið sem hefur aðstöðu um borð til að vinna hvalkjöt.