Sigmundur semur við Þrótt til þriggja ára

Sigmundur Kristjánsson hefur gengið til liðs við sitt æskufélag, Þrótt, eftir fjögurra ára veru í KR.

Hann samdi við Þrótt til næstu þriggja ára en liðið tryggði sér sæti í efstu deild nú í haust.

Hjá KR lék Sigmundur samtals 50 deildarleiki og skoraði í þeim fimm mörk. Hann náði aldrei að vinna stóran titil hjá félaginu en KR var nálægt því að falla um deild í sumar.

„Mig langaði að fara aftur til míns gamla félags," sagði Sigmundur í samtali við Vísi. „Ég vil reyna að leggja mitt af mörkum svo að liðið hætti þessu flakki á milli deilda og festi sig í sessi sem efstudeildarfélag."

Hann segir að hann eigi eftir að sakna KR mikið. „Það er mjög erfitt að fara frá KR en þetta er bara eitthvað sem mig langaði að gera. Gengið var slæmt í sumar sem hafði sín áhrif en mórallinn í KR var góður og hópurinn líka."

Sigmundur segist ekki vera hræddur við að gera svo langan samning við Þróttara. „Alls ekki. Mér finnst að Þróttur eigi heima í efstu deild og svo líst mér líka vel á það sem hefur verið að gerast hjá félaginu. Gunnar Oddsson gerði frábæra hluti með liðið í fyrra og er stefnan nú sett á að gera enn betur."