Sögð vera of feit fyrir glasafrjóvgun

Kona sem hafði byrjað glasameðferð var látin hætta meðferðinni af þeirri ástæðu að hún væri of feit. Settar hafa verið reglur sem meina of feitum konum að hefja glasafrjóvgun.

Konan er töluvert yfir kjörþyngd og vill ekki koma fram undir nafni. Saga hennar er sú, að árið 2004 eignaðist hún barn eftir glasameðferð og gekk fæðing og meðganga eðlilega fyrir sig. Í fyrra langaði hana og sambýlismann í annað barn og hóf hún þá aftur glasameðferð hjá Art Medica í Kópavogi þar sem framkvæmdar eru frjóvgunaraðgerðir. En meðferðin var stöðvuð í miðjum klíðum.

Hún segist aldrei hafa fengið fullnægjandi skýringar á því sem gerðist.

Konan segist hafa upplifað mikla sorg þegar meðferðinni lauk í miðjum klíðum og bendir á að börn sem getin eru með hefðbundnum hætti fái að koma í heiminn án þess að nokkur amist við kjörþyngd mæðranna. Þá segir hún að saga konunnar sem fyrst var meinað að ættleiða barn vegna offitu en fékk þeiri niðurstöðu svo snúið með dómi, hafi reynst henni hvatning. En nú virðist henni öll sund lokuð og það sé enginn hægðarleikur að léttast.

Þórður Óskarsson, sérfræðingur hjá Art Medica, segist harma að konan og maður hennar hafi gengið í gegnum raunir vegna þessa. Málið sé þó ekki vaxið nákvæmlega með þeim hætti sem konan lýsir, en hann geti ekki tjáð sig um mál einstaklinga. Sérfræðingurinn staðfestir hins vegar að síðan konan eignaðist barn sitt með hjálp læknavísindanna hafi verið teknar upp reglur hjá Art Medica þar sem konum mjög langt yfir kjörþyngd sé meinað að hefja glasameðgöngu. Það hafi verið ákveðið til að vernda hagsmuni kvennanna og barnanna og koma í veg fyrir vaxandi fjölda vandamála sem tengjast offitu.

Stöð 2 mun fjalla nánar um þessi mál á morgun.