Hungursneyð yfirvofandi í Simbabve

Hungursneyð vofir yfir Simbabve þar sem fleiri 850 þúsund tonn af maís vantar upp á að náist að næra þjóðina. Í desember var maísuppskeran aðeins 152.600 tonn, þannig að mikið vantar upp á. Ekki hjálpar til að gjaldeyrir er af skornum skammti í landinu sem er eitt fátækasta land heims.

Ríkisstjórn Simbabve harðneitaði að leyfa alþjóðastofnunum að meta ástandið en hjálparstofnunin Famine Early Warning System (FEWS) vann skýrslu sína út frá gervihnattamyndum.

Ríkisstjórnin hyggst flytja inn 565 þúsund tonn af kornmeti, sem er um 60% af því sem upp á vantar. Ekki er hins vegar víst að það markmið náist þar sem efnahagur landsins hefur verið afar bágborinn í að minnsta kosti 6 ár auk þess sem verð á maís frá Suður-Afríku hefur hækkað.

Simbabvebúar ná lægstum meðalaldri í heimi, aðeins 39 ára aldri, þar sem eyðni er landlæg í landinu, auk reglulegs matarskorts og hitabeltissjúkdóma. Þar er einnig hæsta verðbólga heims, 1200%.