Geimhetjan komin heim

Stokkhólmur var á öðrum endanum í dag þegar "geimkóngurinn" Christer Fuglesang kom til baka eftir að hafa farið lengra frá heimalandinu en nokkur annar Svíi hefur gert. Borgarstjórinn og hann skiptust síðan á gjöfum á ráðhúströppunum, Christer fékk lykil að borginni í skiptum fyrir fána sem hann ferðaðist með 203 hringi á sporbaug um jörðu.

Það vakti athygli að Christer skyldi taka lestina heim frá Arlanda-flugvelli tið aðallestarstöðvarinnar í miðbæ Stokkhólms, í stað þess að koma í eðalvagni eins og stjörnum er títt. Hann var hins vegar hæstánægður, því í lestarferðinni fékk hann uppfylltan æskudraum sinn: að sitja við hliðina á lestarstjóranum og svo fékk hann meira að segja að stjórna lestinni á smákafla.