Krafist afsagnar Olmerts og Peretz

Háværar kröfur eru nú meðal stjórnarandstæðinga í Ísrael um að Ehud Olmert, forsætisráðherra landsins, og Amir Peretz varnarmálaráðherra segi af sér eftir að yfirmaður Ísraelshers, Dan Halutz tilkynnti um afsögn sína vegna mistaka sem gerð hefðu verið í stíðinu gegn Hizbollah-samtökunum í Líbanon í sumar.

Stríðinu lauk með ályktun sem samþykkt var á vettvangi Sameinuðu þjóðanna án þess að Ísraelum hefði tekist markmið sitt, sem var að frelsa tvo hermenn úr haldi Hizbollah-liða. Rannsókn hersins á stríðinu leiddi í ljós að herinn hefði gert mistök í stríðinu og sagði Haluitz því af sér. Hins vegar enn verið að rannsaka hlut ríkisstjórnarinnar í stríðinu.

Um þúsund Líbanar féllu í átökunum sem stóðu yfir í rúman mánuð og þá urðu gríðarlegar skemmdir á mannvirkjum í suðurhluta Líbanons í loftárásum Ísraela. 116 ísraelskir hermenn létust í stríðinu og rúmlega 40 borgarar í eldflaugaárásum Hizbollah-liða.