Styður Jafet og vill í stjórn KSÍ

Stefán Geir Þórisson hæstaréttarlögmaður greindi Fréttablaðinu frá því í gær að hann myndi ekki bjóða sig fram til formanns KSÍ en hann býður sig engu að síður fram til setu í stjórn KSÍ.

Stefán Geir segir marga hafa skorað á sig að fara í formannsframboð hjá KSÍ en þar sem framboð Jafets S. Ólafssonar liggi fyrir hafi hann ákveðið að bjóða sig ekki fram. Stefán fagnar framboði Jafets og segir hann hafa þá mannkosti, reynslu og þekkingu sem þarf til að stýra KSÍ í áframhaldandi sókn íslenskrar knattspyrnu.

Stefán segir einnig á að ýmsir hafi bent á mikilvægi þess að með nýjum formanni komi jafnfram nýir menn í stjórnina og þess vegna bjóði hann sig fram til setu í stjórn KSÍ.

„Vonast ég til að reynsla mín og þekking nýtist í störfum mínum fyrir KSÍ: hvort heldur er af fjölbreyttum lögmannsstörfum hérlendis og erlendis eða af rekstri knattspyrnufélagsins Stoke City FC á Englandi um 6 ára skeið og Knattspyrnufélagsins Víkings um 10 ára skeið,“ segir í tilkynningu frá Stefáni Geir sem hefur ekki verið áberandi í íslensku knattspyrnulífi undanfarin ár þó svo hann hafi verið að vinna trúnaðarstörf fyrir Víking.

Tveir einstaklingar - Geir Þorsteinsson og Jafet S. Ólafsson - hafa boðið sig fram til formanns KSÍ og Viðar Halldórsson hefur sagst vera að íhuga framboð en hefur ekki tekið ákvörðun. Ársþing KSÍ fer fram 10. febrúar. - hbg