Kalt bað

Íbúar, í nágrenni nýju íþróttamiðstöðvarinnar í Mosfellsbæ, lentu í vandræðum með heita vatnið á heimilum sínum þegar vatni var hleypt á útisundlaug, og munu hafa velt fyrir sér hvort heitar sturtur heima við heyrðu nú sögunni til. Byggingafulltrúi bæjarins segir það af og frá. Hins vegar eigi eftir að ganga frá tengingum og frágangi á vatnslögnum við laugina.

Á vestursvæði Mosfellsbæjar hefur veglegt íþróttamannvirki risið með almenningssundlaugum og íþróttasal. Innilaug og íþróttahús voru tekin í notkun síðasta haust og nú er beðið eftir að útilaugin komist í gagnið.

Þegar prófað var að keyra dæa í hana vatni brá nágrönnunum þó í brún, því þrýstingur á heita vatninu féll.

Að sögn deildarstjóra tæknideildar Mosfellsbæjar bárust ekki margar kvartanir en hann segir þá sem stóðu í sturtunni helst hafa orðið fyrir óþægindum.

Að sögn byggingafulltrúa í bænum er ekki búið að gefa starfsleyfi á húsið af hálfu heilbrigðiseftilritsins og lokaúttekt hefur enn ekki farið fram. Hann segir að eftir sé að ganga frá ýmsum tæknilegum atriðum í byggingunni, þar á meðal tengingum og frágangi á vatnslögnum.

Þessi vandræði með heita vatnið má rekja til þess að á sama tíma og vatni var dællt í laugina var kalt í veðri og álag á hitaveitukerfinu því mikið. Það náði einfaldlega ekki að dæla vatni á fullum krafti í íbúðahverfið og í laugina sjálfa.

Til að bregðast við vandanum er ætlunin að notuð verði önnur veita fyrir íbúa í hverfinu og hefur framkvæmdum við þá tilfærslu verið flýtt.

Stefnt er að því að útilaugin verði opnuð formlega sumardaginn fyrsta.