Enn er allt á huldu með gaslekann á Manhattan

Engar skýringar hafa enn fengist á dularfullri og megnri gaslykt sem finnst nú víða á Manhattan í New York, jafnvel hátt upp í skýjakljúfa. Fram kom á FOXNews-sjónvarpsstöðinni að ekki væri grunur um hryðjuverkaárás í borginni og New York lögreglan segir enga hættu á ferðum.

Einni skrifstofubyggingu hefur þó verið lokað eftir að tveir starfsmenn þar kvörtuðu vegna gaslyktarinnar og voru fluttir á sjúkrahús. Byggingin er í Jersey City, hinum megin við Hudson ána beint á móti Manhattan.

Á blaðamannafundi klukkann 15.40 að íslenskum tíma sagði Michael Bloomberg, borgarstjóri í New York, að yfirvöld vissu ekki hvaðan gasi kæmi en að þau gætu fullvissað borgarbúa um að það væri ekki hættulegt. Engar fregnar hefðu borist af stórum gasleka í borginni. Minniháttar gasleki hefði orðið í Greenwich Village neðarlega á Manhattan, en varla svo stór að fólk hefði getað fundið lykt af honum um alla eyjun.

Ekki væri vitað hvers konar gas væri á ferðinni en starfsmenn borgarinnar ynnu að því að komast að því hvað væri á ferðinni. Var fólk hvatt til að kveikja á viftum í híbýlum sínum til þess að losna við lyktina.

Haft var eftir forsvarsmönnum ConEd, orkufyrirtækis í New York borg, á Fox-sjónvarpsstöðinni að ekki sé vitað um neinn leka í gasleiðslum fyrirtækisins í borginni. Þúsundir manna hafa reyndu að ná sambandi við neyðarlínuna en gaslyktin fannst víða á Manhattan.