Samkomulag um samsteypustjórn í Austurríki

Tveir stærstu flokkarnir í Austurríki, Sósíaldemókratar og Þjóðarflokkurinn, náðu í dag samkomulagi um myndun samsteypustjórnar í landinu. Alfred Gusenbauer, leiðtogi sósíaldemókrata, verður samkvæmt því kanslari Austurríkis í stað Wolfgangs Schüssels sem verið hefur kanslari síðastliðin sex ár í samstarfi Þjóðarflokksins og flokka yst á hægri kantinum.

Sósíaldemókratar fóru með nauman sigur af hólmi í þingkosningum í Austurríki fyrir um þremur mánuðum og hafa viðræður við Þjóðarflokkinn dregist á langinn meðal annars vegna gagnkvæmra ásakana um viljaleysi til samstarfs.

Þegar almenningi fór að leiðast þófið ákváðu Gusenbauer og Schüssel að setja sér það markmið að ný ríkisstjórn yrði svarin í embætti þann 11. janúar og virðist það nú ætla að takast.