Kúbverjar sem neitað var um hótelgistingu komnir til Noregs

Kúbversk sendinefndinefnd sem neitað var um gistingu á hótelinu Edderkoppen í Osló í síðustu viku lenti á Gardemoen í dag. Berit Ås, fyrrverandi leiðtogi Sósíalíska vinstriflokksins, var meðal þeirra sem tók á móti hópnum með því að syngja kúbverska þjóðsönginn og þannig styðja málstað þeirra.

Sendinefndinni, sem er á leið á ferðaráðstefnu í Noregi, var neitað um gistingu á hótelinu vegna þess að það er í eigu hinnar bandarrísku Hilton-hótelkeðju en viðskiptabann er við Kúbu í Bandaríkjunum. Fram kemur á vef norska ríkisútvarpsins að málið hafi vakið mikla athygli í Noregi og hefur Miðstöð gegn kynþáttahatri kært gjörninginn til yfirvalda. Kúbverjarnir hafa hins vegar fengið húsaskjól á öðru hóteli sem kúbverska sendiráðið hafði milligöngu um að bóka.