Blökkumaður í forsetastól í Hvíta húsinu?

Barack Obama, öldungadeildarþingmaður demókrata í Illinois, tók í dag fyrstu skrefin að hugsanlegu framboði til forseta Bandaríkjanna þegar hann greindi frá því að hefði myndað sérstaka könnunarnefnd sem gerir honum kleift að safna fé og ráða til sín starfsfólk vegna framboðsins.

Obama hefur um nokkurt skeið verið nefndur sem hugsanlegur frambjóðandi demókrata í forsetakosningunum 2008 en hann vakti athygli fyrir ræðu sem hann flutti á flokksþingi demókrata árið 2004. Síðan þá hefur stjarna hans risið í bandarískum stjórnmálum og er hann talinn einn af fáum sem geti keppt við Hillary Clinton, öldungardeildarþingmann og fyrrverandi forsetafrú, um útnefningu Demókrataflokksins fyrir forsetakosningarnar.

Fari svo að hann verði fyrir valinu og sigri í forsetakosningunum verður hann fyrsti blökkumaðurinn til að gegna embætti forseta Bandaríkjanna.