Brasilíumenn leita að eftirmanni Ronaldo

Brasilíska landsliðið í knattspyrnu var ekki í vandræðum með að skora á æfingaferð sinni um Bandaríkin þar sem liðið skoraði sjö mörk í tveimur leikjum. Það er þó ljóst að eftirmaður Ronaldo er enn ekki fundinn.

Ronaldo var ekki með liðinu vegna meiðsla að þessu sinni og þó vel megi vera að hinn 31 árs gamli markahrókur eigi eftir að snúa aftur með landsliðinu, gengur illa að finna hreinræktaðan markaskorara til að taka við af honum í landsliðinu.

Aðeins eitt af þessum sjö mörkum sem Brassarnir skoruðu gegn Mexíkó og Bandaríkjamönnum í æfingaleikjunum komu frá framherja, en það var síðasta markið í leiknum gegn Mexíkó í gær og þar var á ferðinni framherjinn Alonso.

Varnarmennirnir Lucio og Kleber skoruðu sitt hvort markið í æfingaferðinni líkt og þeir Kaka og Ronaldinho á miðjunni - eitt markið kom frá miðjumanniinum Elano úr víti og eitt markið var sjálfsmark.

Framherjarnir Alfonso og Wagner Love eru þeir leikmenn sem hafa verið að fá tækifæri hjá Dunga landsliðsþjálfara undanfarið, en þeir hafa ekki verið sérlega iðnir við kolann. Alfonso var nánást óþekktur í Brasilíu þegar hann var kallaður í landsliðið í fyrsta sinn á þessu ári, en hann leikur með Heerenveen.

Love leikur með liði í Rússlandi og er alveg búsettur þar. Hann skoraði aðeins eitt mark með liði Brasilíumanna í Suður-Ameríkukeppninni þrátt fyrir að hafa verið fastamaður í sókninni og til að mynda skoraði vængmaðurinn Robinho hvorki meira né minna en sex mörk í þeirri keppni.

Framherjinn Fred hjá Lyon í Frakklandi er svo þriðji maðurinn sem hefur verið að fá tækifæri hjá Dunga, en hann er meiddur núna og gat því ekki tekið þátt í leikjum Brassa. Landsliðsþjálfarinn brá á það ráð tímabundið að tefla Kaka fram í fremstu víglínu, en saknaði brátt vinnusemi hans úr miðjuspilinu og hætti við þær áætlanir.

Dunga tapar þó varla svefni yfir því þó framherjarnir skori fá mörk ef liðið heldur áfram að mala eins og það hefur gert undanfarið - og var nokkuð sáttur við gang mála í Ameríkutúrnum.

"Þessir tveir leikir okkar voru frábærir á að horfa og hafa styrkt mig í trúnni á liðið. Liðið óx jafnt og þétt eftir því sem á leikina leið og sýndu góðar framfarir," sagði Dunga ánægður.