Innlent

Lúxusíbúðir rísa á Héðinsreit á næstu árum

Horft á hina nýju byggingu frá horninu á Ánanaustum og Vesturgötu.
Horft á hina nýju byggingu frá horninu á Ánanaustum og Vesturgötu. MYND/Héðinsreitur ehf.

Ríflega 180 lúxusíbúðir sem hugsaðar eru fyrir fólk eldra en 55 ára munu rísa á svokölluðum Héðinsreit við Ánanaust á næstu tveimur árum. Það er eignarhaldsfélagið Héðinsreitur sem hyggst byggja íbúðahúsið en gert er ráð fyrir að það liggi frá Mýrargötu, með fram Ánanaustum og upp Vesturgötu að Seljavegi. Sex hæðir verða ofanjarðar og bílakjallari niðurgrafinn.

Borgarráð samþykkti á dögunum að selja Héðinsreit byggingarétt á lóðum við Vesturgötu og Seljaveg og að sögn Ágústu Símonardóttur, framkvæmdstjóra Héðinsreits ehf., er félagið nú búið að tryggja sér allar lóðir fyrir uppbygginguna. Gert er ráð fyrir að íbúðirnar verði seldar á almennum markaði og en í húsinu er jafnframt gert ráð fyrir einhverri þjónustu eins og hárgreiðslu- og snyrtistofum.

Loftmynd af fyrirhuguðu íbúðahúsi á Héðinsreitnum.MYND/Héðinsreitur ehf.

Ágústa segir að uppbygging hússins hafi verið í undirbúningi frá árinu 2003 og að nú verði farið í að undirbúa niðurrif á lóðunum ásamt því að leggja inn teikningar af húsinu hjá byggingarfulltrúa til samþykktar. Félagið áformi að hefja uppbygginguna í byrjun næsta árs og að 1. áfangi hússins, eða um 60 prósent íbúðanna, verði tilbúinn einu og hálfu ári síðar. Verkinu á svo að vera lokið að fullu hálfu ári eftir það.

Aðspurð hvort mikill áhugi sé fyrir lúxusíbúðum sem þessum segir Ágústa að félagið sé þegar með lista af fólki sem vilji kaupa íbúðir á þessum stað. „Fólk vill vera niðri í miðbæ þar sem stutt er í þjónustu og leikhús og veitingastaði. Svo er að verða mikil breyting á Mýrargötunni og Geirsgötunni og nýtt tónlistarhús að rísa við höfnina. Það verða því miklar breytingar á svæðinu á næstu árum," segir Ágústa.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×