Raunhæft að stefna á sigur

Franska landsliðið hefur unnið báða leiki sína í riðlinum 6-0 og situr í sæti númer 7 á styrkleikalista FIFA. Ísland er í 21. sæti. Landsliðsþjálfarinn Sigurður Ragnar Eyjólfsson er þó hvergi banginn fyrir leikinn.

„Það er raunhæft að stefna á sigur, en þetta verður mjög erfiður leikur. Frakkar eru sterk þjóð en það má ekki gleyma því að við erum líka með marga leikmenn sem eru framúrskarandi á alþjóðlegan mælikvarða,“ sagði Sigurður.

„Frakkar spila mjög góða knattspyrnu, þær halda boltanum vel og spila skemmtilega. Þær eru með nokkra mjög fljóta leikmenn, meðal annars eina allra fljótustu stelpu sem ég hef séð. Við þurfum að hafa góðar gætur á þeim því þær eru sterkar sóknarlega. Ef við spilum þéttan varnarleik og beitum öguðum skyndisóknum eigum við eftir að fá okkar færi. Þau þurfum við að nýta og þá eigum við fulla möguleika á að vinna, ég fer ekkert ofan af því,“ sagði Sigurður.

Landsliðsþjálfarinn hefur skoðað lið Frakka vel og meðal annars sá hann leik þeirra gegn Grikkjum. „Ég mun gera leikmönnum mínum ljóst fyrir leikinn hvernig Frakkar spila. Maður sér ákveðna rútínu hjá þeim, við þurfum að vera vakandi fyrir því. Ég hef séð nokkra leiki með þeim á spólum og svo fór ég á leikinn gegn Grikkjum.“

Gegn jafn sterku liði er eðlilegt að landsliðsþjálfarinn leggi áherslu á varnarleikinn. „Við munum leggja áherslu á þéttan varnarleik. Við erum með sterkt lið sóknarlega, liðið hefur skorað í öllum leikjum undir minni stjórn nema einum og við erum að skora meira en tvö mörk að meðaltali í leik. Við erum líka sterk í föstum leikatriðum, það þurfum við að nýta okkur,“ sagði Sigurður.

Í næstu viku mæta Íslendingar Serbum, sem munu auk Frakka keppa við Ísland um laust sæti á EM. „Þessir tveir leikir núna eru gríðarlega mikilvægir fyrir okkur, líklega mikilvægustu leikirnir. Við þurfum á góðum úrslitum á heimavelli að halda,“ sagði þjálfarinn.