Búið að afskrifa okkur Skagamenn

Íslandsmótið í knattspyrnu hefst í dag þegar Íslandsmeistarar FH fara í heimsókn til ÍA á Skipaskaga. Þessum opnunarleik hefur verið beðið með mikilli eftirvæntingu, ekki síst vegna þeirrar staðreyndar að Guðjón Þórðarson er að stýra sínum fyrsta deildarleik með ÍA í tæp ellefu ár.

„Ég hlakka til, þetta verður spennandi,“ sagði Guðjón við Fréttablaðið í gær. „Það vilja allir byrja vel og FH hefur alltaf byrjað vel undanfarin ár.“

Eins og flestir vita hafa FH-ingar unnið deildina síðastliðin þrjú ár, þar af síðustu tvö með miklum yfirburðum. Og öll þessi þrjú ár hefur FH byrjað á tveimur útileikjum, rétt eins og nú.

„Mér er í sjálfu sér sama hvort við byrjum á útivelli eða ekki. Það þarf að spila alla þessa leiki hvort eð er,“ sagði Ólafur Jóhannesson, þjálfari FH. „Akranes er einn mesti fótboltabær landsins og ekki auðvelt að fara þangað og spila. Svo er gamli þjálfari liðsins að koma aftur og eftirvæntingin eftir árangri er mikil þó þeir séu að reyna að tala hana niður. Við erum að fara í hörkuleik og ætlum ekki að vanmeta Akranesliðið.“

Eins og gefur að skilja ríkir mikil tilhlökkun í herbúðum beggja liða fyrir leikinn. En Ólafur segir að mikilvægi leiksins sé ekki meira en fyrir hvaða leik sem er. „Þetta er bara einn af átján leikjum. Allir leikir skipta máli þegar upp er staðið en úrslit þessa leiks munu ekki hafa nein afgerandi áhrif upp á framhaldið að gera,“ sagði Ólafur.

Guðjón segir að sínir menn hafi verið afskrifaðir fyrir þennan leik. „Ég hef heyrt að menn spái FH 6-0 sigri í þessum leik. Svo er stuðullinn á heimasigur á Lengjunni fjórir þannig að það er greinilegt að menn hafa ekki trú á okkur,“ sagði Guðjón. „Svo má ekki horfa fram hjá því að FH er með þrjá frábæra Skagamenn í sínu liði þannig að þeir eins og mörg önnur lið njóta góðs af uppeldisstarfi ÍA,“ sagði hann og átti þar við tvíburabræðurna Arnar og Bjarka Gunnlaugssyni sem og Frey Bjarnason.

Báðir þjálfarar geta valið flesta sína sterkustu menn í leikinn. Hjá FH eru þeir Auðun Helgason og Atli Viðar Björnsson fjarverandi vegna meiðsla. „Ég er að vonast til þess að ég geti nú í fyrsta skipti síðan ég tók við liðinu valið úr öllum hópnum. Það eru góðar fréttir,“ sagði Guðjón.

Sem fyrr eru FH-ingar með stóran og breiðan hóp leikmanna en Ólafur ætti að vera orðinn vanur því að taka erfiðar ákvarðanir. „Í FH verða alltaf góðir menn fyrir utan byrjunarliðið og leikmannahópinn. Þannig er þetta í þjálfarastarfinu, stundum þarf maður að taka óvinsælar ákvarðanir og er ég ekki feiminn við það.“