Heiðmerkurkæran er prófmál

Jón Loftsson skógræktarstjóri álítur kæru sína vegna framkvæmda í Heiðmörk vera prófmál, sem gæti breytt því til frambúðar hvernig gengið er um skóga hér á landi.

Jón telur tíma til kominn að öll sveitarfélög taki tillit til skógræktarlaga. Eins og sjálfsagt sé að virða fornleifar sem finnist við framkvæmdir, ættu menn einnig að gera ráðstafanir þegar byggja þarf í skóglendi.

„Við höfum engan áhuga á að vera að standa mikið í kærumálum. Það þarf bara að koma þessu inn í skipulagsferlið að það verði sjálfsagt að hafa samband við Skógrækt ríkisins til að fá ráðleggingar og að sannarlega verði til jafn mikill skógur og hverfur og að honum verði komið fyrir á stað þar sem hann getur örugglega fengið að vera í friði í einhverja áratugi,“ segir Jón. Heiðmerkurkæran sé í fyrsta skipti í hundrað ára sögu skógræktarlaganna sem þeim verði í raun og veru beitt. Það gangi ekki að hunsa lög sem séu sveitarstjórnunum óþægileg. Því verði kærunni fylgt eftir fram í rauðan dauðann.

Skógræktarfélag Íslands hefur metið tjónið í Heiðmörk og telur að um þúsund plöntum hafi verið fargað. Fjárhagslegt tjón gæti verið upp á 38 milljónir króna. Kópavogsbær er ekki á sama máli og Gunnar I. Birgisson bæjarstjóri talar um sextíu til níutíu plöntur sem hafi eyðilagst.