Saka Fatah-liða um tilræði við Haniyeh

Hamas-samtökin segja liðsmenn í Fatah-hreyfingunni hafa reynt að ráða Ismail Haniyeh, forsætisráðherra palsestínsku heimastjórnarinnar, af dögum við Rafha-landamærastöðina á Gasaströndinni í gær þar sem kom til átaka milli fylkinganna.

Einn lífvörður lést og sonur Hanyiehs særðist ásamt um 20 öðrum í átökunum en Hanyieh var að snúa til baka frá Egyptalandi með fjármuni frá bakhjörlum palestínsku þjóðarinnar. Ísraeslsmenn meinuðu honum hins vegar að fara með féð yfir landamærin og þegar Haniyeh loks fékk að fara yfir landamærin, án fjárins, hófst skothríð á bílalest hans en hann komst þó heill heim til sín. Átök félaga í Hamas og Fatah hafa stigmagnast að undanförnu og ekki útlit fyrir að bardaginn í gær lægi öldurnar.