Forsetafrú Taívans á sjúkrahús eftir réttarhöld

Wu Shu-chen, forsetafrú Taívans, var flutt á sjúkrahús í morgun eftir að það leið yfir hana skömmu eftir að réttarhöld yfir henni vegna fjársvika hófust. Wu, sem er í hjólastjól, hefur verið heilsutæp og var óttast að hún gæti ekki ekki verið viðstödd réttarhöldin vegna þess en hún mætti í dómhúsið í morgun.

Þar átti að rétta yfir henni vegna ákæru um að hún hefði, ásamt þremur aðstoðarmönnum forsetans, svikið út um 30 milljónir króna úr sérstökum sjóði forsetaembættisins til eigin nota. Wu var flutt burt í sjúkrabíl og að sögn lækna þjáist hún meðal annars af of hægum hjartslætti. Hún mun þó ekki vera í lífshættu.