Sex ára í háskólakennslu

Sex ára undrabarn frá Mexíkó heldur fyrirlestra um beinþynningu fyrir læknisfræðinema á háskólastigi. Sjálfur neitar drengurinn því að hann sé snillingur og segist bara venjulegur strákur sem hafi gaman af að læra.

Á meðan vinir hans voru úti í boltaleik í gær, eða að gera það sem sex ára börn gera alla jafna, hélt Maximilliano Arejano lærðan fyrirlestur um beinþynningu fyrir læknisfræðinema í háskóla í smábæ í Mexíkó. Nemendurnir, sem eru allir meira en þrisvar sinnum eldri en Arejano, hlustuðu af ákafa á viðamikla þekkingu drengsins á sjúkdómnum, sem einhverra hluta vegna hefur fangað athygli hans svo um munar. En þrátt fyrir að þekkja öll einkenni beinþynningar og hafa þekkt níutíu höfuðborgir þegar hann var þriggja ára, neitar Arejano því alfarið að hann sé eitthvað öðruvísi en önnur börn.