Umfangsmestu aðgerðir frá innrás

Stærstu hernaðaraðgerðir Bandaríkjamanna í Írak, síðan herinn réðst inn í landið árið 2003, hófust í gær. Yfir fimmtíu flugvélar og um fimmtán hundruð bandarískir hermenn taka þátt í aðgerðunum. Talið er að hermennirnir séu búnir að handtaka um 40 manns.

Aðgerðirnar beinast að meintum andspyrnu og hryðjuverkamönnum nálægt borginni Samarra, um 80 kílómetra norður af Bagdad höfuðborg landsins. Talið er að þær muni standa yfir í nokkra daga að því er fram kemur í tilkynningu frá bandarískum yfirvöldum. Í febrúar gerðu uppreisnarmenn sprengjuárás á mosku sjía í Samarra með þeim afleiðingum að hörð átök hófust milli sjía og súnnímúslima og er landið nú á barmi borgarastyrjaldar.

George Bush, Bandaríkjaforseti segir þó afar ólíklegt að til þess komi. Bandarískir og íraskir hermenn umkringdu í gær fjögur þorp skammt frá Samarra. Þegar hefur verið lagt hald á talsvert af vopnum en fregnir af mannfalli hafa ekki borist.

Mannfall í Írak hefur þó aukist verulega síðan al-Askari-moskan í Samarra var sprengd í síðasta mánuði og hafa yfir 600 Írakar falllið í átökunum. Þá falla nú að meðaltali 30 á dag í stað 10 áður segir í tilkynningunni. Frá því Bandaríkin ruddust inn í landið hafa 2300 bandarískir hermenn fallið í landinu og er óttast að sú tala muni hækka mjög áður en stríðið er á enda.