Lík Milosevic flutt frá Haag

Lík Slóbódans Milosevic, fyrrverandi forseta Júgóslavíu, var flutt frá Haag í Hollandi á flugvöllinn í Amsterdam síðdegis í dag. Marko Milosevic sótti lík föður síns.

Serbneskur dómstóll hefur dregið til baka handtökuskipun á hendur Mirjönu Markovic, ekkju Milosevic, og hafa líkur aukist á að hann verði grafinn í heimalandi sínu.

Niðurstaða krufningar í Hollandi er sú að Milosevic hafi látist af völdum hjartaáfalls á laugardag, en hann var þá í haldi stríðsglæpadómstólsins í Haag. Dómstólinn hefur nú réttað yfir honum í fjögur ár. Málinu var formlega lokað í dag án niðurstöðu og segja dómarar það miður fyrir þá sem að málinu hafa komið.