Handtökuskipunin dregin til baka

Serbneskur dómstóll hefur dregið til baka handtökuskipun á hendur Mirjönu Markovic, ekkju Slobodans Milosevic. Þar með hafa líkurnar á að forsetinn fyrrverandi verði grafinn í heimalandi sínu, aukist. Marko, sonur þeirra, kveðst fullviss um að faðir sinn hafi verið ráðinn af dögum.

Mirjana Markovic er eftirlýst í Serbíu en hún er meðal annars ásökuð um fjársvik og samsæri um að myrða pólitískan andstæðing eiginmanns síns. Í dag ógilti hins vegar dómstóll í Belgrað handtökuskipun gegn Markovic og þar með snarjukust líkurnar á að Slobodan Milosevic yrði jarðsettur í heimalandi sínu. Í staðinn reiddu lögmenn hennar fram rúma eina milljón króna til tryggingar því að hún færi á fund dómara eftir rúma viku og svaraði spurningum hans. Ekki er þó sjálfgefið að Markovic gangi að þessum skilmálum því fari hún til Belgrað verður vegabréfið tekið af henni og þá gæti reynst erfitt fyrir hana að snúa aftur til Moskvu þar sem hún býr nú. Fréttaritari BBC í Belgrað segir serbneska ráðamenn afar grama yfir ákvörðun dómstólsins enda eru þeir mjög andsnúnir því að útför forsetans fyrrverandi fari fram í landinu.

Marko Milosevic kom til Haag fyrr í dag til að ná í líkið af föður sínum. Á leiðinni til Hollands fullyrti Marko að þeir sem hefðu staðið í vegi fyrir að faðir sinn færi til lækninga í Rússlandi hefðu vísvitandi orðið honum að bana.

Formlegra niðurstaðna krufningar er enn beðið en í gær upplýsti hollenskur eiturefnafræðingur að í líkama Milosevic hefðu fundist lyf sem óbeint hefðu valdið hjartaáfallinu sem dró hann til dauða. Fjórir rússneskir læknar eru á leiðinni til Haag til að gera sjálfstæða athugun á líkinu en rússnesk stjórnvöld hafa dregið hlutleysi lækna stríðsglæpadómstólsins í efa.