Óvinsældir Bush aldrei meiri

George Bush, forseti Bandaríkjanna, fullyrðir að þótt ástandið í Írak sé spennuþrungið, sé lítil sem engin hætta á borgarastyrjöld. Hvatti forsetinn landa sína til að vera þolinmóða. Sprengjutilræði í mosku sjía í Írak þann 22. febrúar leiddi til þess að hátt í þúsund manns hafa fallið í hefndaraðgerðum. Óvinsældir Bush hafa aldrei verið meiri og krefjast sífellt fleiri þess að bandaríski herinn verði kvaddur heim frá Írak hið fyrsta. Ekki er víst að svo verði en varnarmálaráðherra Bretlands, tilkynnti hins vegar í gær að breskum hermönnum í suðurhluta Íraks verði fækkað um tíu prósent í sumar eða úr 8.000 í 7.200.