Björgunarmenn í lífshættu á Hofsjökli

Tugir manna tóku þátt í björgunaraðgerðunum á Hofsjökli í gærkvöld, við afar erfiðar og lífshættulegar aðstæður. Um þrjú hundruð björgunarsveitamenn voru kallaðir til vegna slyssins, auk lögreglu, slökkviliðs- og sjúkraflutningamanna. Björgunarmenn voru í lífshættu allan tímann, enda margar sprungur á svæðinu og að þeirra sögn brotnaði stundum undan fótum manna og þeir horfðu ofan í hyldýpið.

 

Rúmlega tvítugur maður lést þegar jeppabifreið fór ofan í sprungu á Hofsjökli um miðjan dag í gær. Annar maður á svipuðum aldri sem var í bílnum, slasaðist alvarlega og liggur enn á gjörgæslu en líðan hans er stöðug að sögn lækna. Mennirnir voru á leið norður yfir Hofsjökul á breyttum Toyota pallbíl, -í samfloti við tvo aðra jeppa. Veður var gott og ágætis skyggni. Leiðangurinn var kominn vel inn á jökulinn, en hefur af einhverjum ástæðum farið út af hinni venjulegu leið og inn á sprungusvæði rétt norðan við Hásteina. Þar brast haft yfir sprungu þannig að jeppinn féll ofan í sprunguna og stöðvaðist á um þrjátíu metra dýpi.

 

Ferðafélagarnir brugðust hárrétt við slysinu, -héldu kyrru fyrir og hringdu í Neyðarlínu með NMT-símum og biðu átekta. Þetta var uppúr klukkan þrjú í gær. Björgunarsveitir voru strax kallaðar út, frá Norðurlandi, Suðurlandi, -og af höfuðborgarsvæðinu.

 

Strax varð ljóst að nausyn væri á þyrlum við björgunina. Þyrla frá danska varðskipinu Triton, var fyrst á staðinn. Hún fór úr Reykjavík með tvo menn frá slökkviliðinu og einn frá Landsbjörgu. Þá voru einnig kallaðar til þyrlur frá varnarliðinu, en báðar þyrlur Landhelgisgæslunnar voru fjarri góðu gamni. Björgunarmenn þurftu að síga um þrjátíu metra niður í sprunguna til að ná til mannanna þar sem þeir voru fastir í jeppa sínum. Jeppinn var mjög illa skemmdur eftir fallið og þurftu björgunarmenn að beita klippum til að skera hann sundur svo hægt væri að ná mönnunum út. Þeir voru síðan hífðir upp úr sprungunni og sá slasaði fluttur með þyrlu til Reykjavíkur. Hún lenti við Landspítalann í Fossvogi laust fyrir klukkan eitt í nótt.

 

Tugir manna tóku þátt í björgunaraðgerðunum á Hofsjökli í gærkvöld, við afar erfiðar og lífshættulegar aðstæður. Um þrjú hundruð björgunarsveitamenn voru kallaðir til vegna slyssins, auk lögreglu, slökkviliðs- og sjúkraflutningamanna. Meðal þeirra sem komu fyrstir á slysstað með dönsku þyrlunni voru þeir Ari Jóhannes Hauksson, sem stjórnaði aðgerðum við sprunguna á Hofsjökli, og Guðmundur Guðjónsson sem seig niður í að bílnum í sprungunni. Þeir segja að björgunarmenn hafi verið í lífshættu allan tímann, enda margar sprungur á svæðinu og stundum hafi brotnað undan fótum manna og þeir horft ofan í hyldýpið.