Krani féll á blokk í Battersea í London

Mildi þykir að ekki fór verr þegar 50 metra hár byggingarkrani hrundi á íbúðarblokk í suðvesturhluta Lundúna í gær. Kraninn var við störf nærri Battersea rafstöðinni, á bökkum Thames-árinnar. Tveir menn létust, stjórnandi kranans og annar, sem ekki er talinn hafa verið starfsmaður við bygginguna.

Þriðji maðurinn var færður á sjúkrahús með minniháttar meiðsl. Íbúar í nærliggjandi húsum höfðu áður lýst áhyggjum sínum af því að stórvirkar vinnuvélar væru að störfum svo nærri íbúðarhúsnæði.