186,3 milljónir króna greiddar til Byrgisins

Félagsmál Ráðuneytið og ríkisendurskoðun hafa ótvíræða eftirlitsskyldu með starfsemi Byrgisins, samkvæmt yfirlýsingu um greiðslu styrks frá félagsmálaráðuneytinu til Byrgisins.

Samkvæmt upplýsingum sem Byrgið óskaði eftir frá félagsmálaráðuneytinu, og svarað var í gær, nema framlög ráðuneytisins til Byrgisins samtals 186,3 milljónum króna ef húsaleiga frá 2003 er tekin með í reikninginn, frá árinu 1999 til og með 2006.

Eins og greint var frá í Fréttablaðinu í gær sendi Magnús Stefánsson félagsmálaráðherra stjórn sjálfseignarstofnunar Byrgisins sjö spurningar með ósk um skjót svör. Guðmundur Jónsson og Jón A. Einarsson svöruðu spurningunum fyrir hönd stjórnarinnar þremur dögum síðar.

Ráðherra spurði sérstaklega að því hvaða aðili hefði eftirlit með starfsemi Byrgisins. Í svörunum kemur skýrt fram að ríkisendurskoðun og félagsmálaráðuneytið bæru ábyrgð á eftirliti með starfsemi Byrgisins en einnig er það nefnt að Guðmundur, Ólafur Ólafsson, fyrrverandi landlæknir, og Magnús Skúlason læknir bæru ábyrgð á faglegu starfi Byrgisins.

Ólafur segir ábyrgð hans og Magnúsar aðeins tengjast læknisfræðilegri starfsemi. „Við berum læknisfræðilega ábyrgð á okkar störfum, eðli málsins samkvæmt. Við stöndum hins vegar ekki í rekstri og komum ekki að annarri starfsemi heldur en læknastörfum. Það er ekki löglegt að láta okkur bera ábyrgð á öðrum þáttum en snúa að læknastarfsemi. Því er nauðsynlegt að árétta það að okkar faglega ábyrgð snýr eingöngu að læknastörfum.“

Magnús sagðist í samtali við Fréttablaðið einnig líta svo á að ábyrgð hans og Ólafs sneri að læknastörfum en ekki annarri starfsemi Byrgisins.

Þrettán eru nú vistaðir í Byrginu en fjórir starfsmenn búa þar nú um stundir.

Að sögn Jóns A. Einarssonar, sem starfar sem forstöðumaður Byrgisins á meðan lögreglan rannsakar meint kynferðisbrot hans og fjármálamisferli, segir alla reyna eftir fremsta megni að gera aðstæður vistmanna sem bestar. Hann vildi ekki tjá sig um hvort ásakanir á hendur Guðmundi, sem gert var grein fyrir í fréttskýringaþættinum Kompási á Stöð 2 fyrr í mánuðinum, hafi haft bein skaðleg áhrif á vistmenn.