Franskir stúdentar mótmæla enn

Umsátursástand var í fjölmörgum háskólum víðsvegar um Frakkland í dag þegar mörg þúsund háskólanemar mótmæltu nýrri vinnulöggjöf stjórnvalda. Stúdentar segjast fullvissir að mótmælin hafi tilætluð áhrif og hætt verði við gildistöku laganna. Ekkert virðist þó benda til þess.

Háskólanemar í París hafa verið háværir í mótmælum sínum og í dag tóku nemendur í Marseille, Bordeaux, Grenoble og Rennes undir með þeim. Til átaka kom milli mörg hundruð stúdenta og lögreglu við Sorbonne-háskóla í París í dag. Grímuklæddir mótmælendur köstuðu flöskum, steinum og hlutum málmgirðingar að óeirðalögreglu sem svaraði með táragasi.

Þrýstingur á stjórnvöld, og sér í lagi Dominique de Villepin, forsætisráðherra, hefur því aukist til muna. Lögin eru afar umdeild en þau heimila fyrirtækjum að reka starfsfólk undir 26 ára aldri fyrirvaralaust fyrstu tvö ár þess í starfi. Stjórnvöld segja sveigjanleika á vinnumarkaði aukinn með lögunum og að atvinnuleysi muni minnka en það er tæp 10% á landsvísu og rúm 22% meðal ungs fólks.

Þeir sem gagnrýnt hafa stjórnvöld vegna lagasetningarinnar segja að allt geti farið úr böndunum ef ríkisstjórnin gefi ekki eitthvað eftir í málinu. Menntamálaráðherra segir stefna í að kensla raskist töluvert í 17 af 84 ríkisháskólum í Frakklandi og talið að kennsla raskist nokkuð í hátt í 30 til viðbótar.