Markviss áróður gegn stjórnvöldum í Íran

Bandaríkjastjórn hyggst hefja markvissan áróður gegn stjórnvöldum í Íran. George Bush Bandaríkjaforseti sakaði Írana í dag um að eiga stóran þátt í ófremdarástandinu í Írak.

Í ræðu um Íraksstríðið í dag beindi Bush spjótum sínum að stjórnvöldum í Tehran. Íranar ættu að nokkru þátt í óöldinni í Írak, með því að framleiða efni til sprengjugerðar, sem árásarmenn í Írak notuðu í öflugustu sprengjur sínar. Þessi ummæli Bush eru í takt við þá línu sem stjórnvöld í Washington virðast hafa lagt eftir tregðu Íransstjórnar til að láta af kjarnorkuþróun sinni.

Dagblaðið Washington Post hefur eftir yfirmönnum Hoover stofnunarinnar, sem hittu Bush og Dick Cheney varaforseta fyrir skömmu að augljóst væri að Bandaríkjastjórn hefði skipt um kúrs varðandi Íran og nú ætti að beita hörðu frekar en að reyna enn á ný að semja við stjórnvöld í Íran. Skilaboðin frá stjórnvöldum í Washington væru skýr.... nú ætti að reyna að fá almenning í Íran upp á móti stjórnvöldum og með því móti bola núverandi stjórn frá völdum.

Varnarmálaráðuneytið bandaríska hefði nú tíu sérfræðinga á fullum launum við það eitt að vinna að málefnum í Íran, en hingað til hefðu aðeins tveir gegnt þessum starfa. Þá væri auglóst að Bush sjálfur eyddi meiri tíma en áður í að ráðfæra sig við sérfræðinga í málefnum Íransm og á síðustu mánuðum hefði um fjörutíu sérfræðingum í málum landsins verið boðið sérstaklega til funda í Hvíta Húsinu.