Krefjast afsagnar forsætisráðherra Tælands

Búist er við að allt að 100 þúsund mótmælendur safnist saman við skrifstofu Thaskin Shinawatra, forsætisráðherra Tælands á morgun til að krefjast afsagnar hans. Almenningur í Tælandi hefur staðið fyrir friðsömum fjöldamótmælum undanfarin mánuð í eftir að fjölskylda forsætisráðherrans seldi fyrirtæki sitt til fjárfestingarfyrirtækis í eigu stjórnvalda í Singapore.

Fjölskylda forsætisráðherrans hagnaðist um 2 milljarða bandaríkjadala af sölunni en greiddi enga skatta til tælenska ríkisins. Þrátt fyrir að löglega hafi verið staðið að sölunni hefur hún vakið hörð viðbrögð almennings í Tælandi sem telur að Thaskin sé uppteknari af eigin hag en hagsmunum lands síns.

Thaskin hefur rofið þing og boðið til kosninga í landinu þann annan apríl til þess að draga úr óró almennings í landinu.