Samningaviðræðum haldið áfram

Afríkubandalagið hefur haft milligöngu um friðarviðræður uppreisnarmanna í Darfur og súdönsku ríkisstjórnarinnar sem fram hafa farið í Abúdja, höfuðborg Nígeríu, undanfarna daga. Fresturinn sem fylkingarnar höfðu gefið sér rann út á miðnætti en þá stóðu umræður um sáttatilboð bandalagsins sem hæst. Í því var kveðið á um að uppreisnarmenn legðu niður vopn og gengju í súdanska herinn og í staðinn myndu stjórnvöld í Kartúm stórauka fjárframlög til héraðsins og vígasveitir þeim hliðhollar afvopnast. Súdanska stjórnin hefur fyrir sitt leyti samþykkt skilmálana en leiðtogum uppreisnarmannanna hefur ekki tekist að koma sér saman um afstöðu til tilboðsins. Því var ákveðið að framlengja viðræðurnar um tvo sólarhringa og freista þess að ná sáttum. Litlar líkur eru hins vegar taldar á að það takist. Hinum megin Atlantshafsins, eða í Washington nánar tiltekið, var skorað var á alþjóðasamfélagið, og sérstaklega bandarísk stjórnvöld, að grípa inn í deiluna um Darfur og binda enda á ófriðinn. Leikarinn George Clooney var á meðal þeirra sem ávarpaði fundinn í gærkvöld og sagði hann harmleikinn í Darfur vera "fyrsta þjóðarmorð 21. aldarinnar." 200.000 manns hafa farist í átökum í héraðinu sem hófust árið 2003 og tvær milljónir eru heimilislausar