Beckett verður utanríkisráðherra Bretlands

Tony Blair, forsætisráðherra Bretlands, gerði róttækar breytingar á ráðuneyti sínu í dag eftir að Verkamannaflokkurinn beið mikinn ósigur í sveitarstjórnarkosningunum á Englandi. Margaret Beckett verður utanríkisráðherra. Hún er fyrst kvenna til að gegna því embætti.

Óhætt er að segja að gustað hafi um ríkisstjórn Tony Blairs að undanförnu. Hvert hneykslismálið hefur rekið annað og nægir í því sambandi að nefna framhjáhald aðstoðarforsætisráðherrans Johns Prescott. Því var búist við að Verkamannaflokknum myndi vegna illa í sveitarstjórnarkosningunum sem fram fóru á Englandi í gær og þegar talið hafði verið upp úr kjörkössunum kom í ljós að þær spár höfðu ræst svo um munaði. Sveitarstjórnarmönnum flokksins fækkar um tæplega fjórðung á næsta kjörtímabili og í átján sveitarfélögum hefur hann misst meirihluta sinn. Tony Blair beið ekki boðanna því í morgun gerði hann róttækari breytingar á ráðherraliði sínu en dæmi eru um í forsætisráðherratíð hans. Sá fyrsti til að taka pokann sinn var Charles Clarke innanríkisráðherra.

Afsögn Clarke kom fáum á óvart eftir að upp komst að hann hafði leynt upplýsingum um að á annað þúsund fangar af erlendu bergi brotnu hefðu verið látnir lausir án þess að fjallað hefði verið um hvort reka ætti þá úr landi. Meiri athygli vekja umskiptin í utanríkisráðuneytinu. Margaret Beckett umhverfisráðherra tekur við stjórnartaumunum þar af Jack Straw, sem var lækkaður í tign og gerður að þingflokksformanni í neðri deildinni. Beckett verður fyrsta konan sem sest í stól utanríkisráðherra Bretlands. Af öðrum umskiptum má nefna að John Reid verður innanríkisráðherra og Jonn Prescott heldur starfi sínu sem aðstoðarforsætisráðherra, í útvatnaðri mynd þó.

Umreiknað á landsvísu þýða úrslitin í gær að Verkamannaflokkurinn er þriðji stærsti flokkur landsins, á eftir Íhaldsflokknum og frjálslyndum demókrötum. Íhaldsmenn fengu yfir fjörtíu prósent atkvæða og hefur þeim ekki gengið svo vel síðan árið 1992. David Cameron, nýkjörinn leiðtogi flokksins, þykir þannig hafa staðist sitt fyrsta próf með miklum ágætum. Árangur Breska þjóðarflokksins hefur einnig vakið athygli. Sá flokkur berst gegn fjölgun útlendinga í landinu og því hafa margir áhyggjur af uppgangi hans.