Nýtt mannréttindaráð samþykkt

Nýtt mannréttindaráð Sameinuðu Þjóðanna hefur verið samþykkt og kemur í stað gömlu mannréttindanefndarinnar.

Leyfilegt verður að reka aðildarríki úr ráðinu ef þau brjóta mannréttindi. Allsherjarþing Sameinuðu Þjóðanna samþykkti í gær með yfirgnæfandi meirihluta að stofna nýtt mannréttindaráð í stað mannréttindanefndar Sameinuðu Þjóðanna sem hefur aðsetur í Genf. Hún hefur verið gagnrýnd fyrir linkind gagnvart ríkjum sem brjóta kerfisbundið mannréttindi og fyrir að leyfa þeim að hafa áhrif á störf nefndarinnar.

Fjörutíu og sjö þjóðir mun sitja í hinu nýja mannréttindaráði í senn, í stað fimmtíu og þriggja nú. Hver þjóð verður kjörin í ráðið til þriggja ára í einu og getur mest setið tvö kjörtímabil í röð, en verður að því loknu að sitja hjá eitt kjörtímabil. Ráðið mun hittast minnst tíu vikur á ári, í stað sex vikna mannréttindanefndarinnar nú og auk þess verður hægt að kalla það saman með litlum fyrirvara ef tilefni þykir.

Hundrað og sjötíu þjóðir samþykktu tillöguna í gær, en aðeins fjórar greiddu atkvæði gegn henni. Það voru Bandaríkin og Ísrael, auk örþjóðanna Palau og Marshall-eyja. Fulltrúar Bandaríkjanna gagnrýndu tillöguna á þeim forsendum að ekki væri gengið nógu langt til að koma alfarið í veg fyrir að þjóðir sem brytu mannréttindi gætu haft áhrif á ákvarðanir mannréttindaráðsins. En þrátt fyrir það segjast Bandaríkjamenn ætla að starfa með hinu nýja ráði í einu og öllu.