62 milljónir myndu látast í flensufaraldri

Ef kæmi upp alþjóðlegur inflúensufaraldur núna þá gæti hann dregið allt að 62 milljónir manna til dauða, að því er sérfræðingar hafa varað við. Spænska veikin sem herjaði um mestalla heimsbyggðina veturinn 1918-1919, varð 50 milljónum manna að bana. Fátækustu þjóðir heims yrðu verst úti, sérstaklega þar sem eyðni er landlæg.

Banvænir inflúensufaraldrar koma að meðaltali upp um það bil þrisvar til fjórum sinnum á öld. Sumir vísindamenn telja að það styttist í nýjan faraldur og sá næsti gæti farið af stað við stökkbreytingar á fuglaflensuveirunni. Hingað til hefur H5N1 afbrigði fuglaflensuveirunnar, sem er banvænt mönnum, orðið 258 mönnum að bana. Þessir hafa smitast af fuglum, að minnsta kosti hefur ekki enn tekist að sýna fram á með óyggjandi hætti að nokkurt tilfellanna hafi ekki verið á þann veg. Fuglaflensan verður ekki að faraldri í mönnum fyrr en hún hættir að vera húsdýrasjúkdómur og fer að smitast á milli manna.

Til þess að spá fyrir um fjölda dauðsfalla ef faraldur kæmi upp núna rannsakaði hópur vísindamanna undir stjórn Christophers Murray prófessors hvernig spænska veikin breiddist út á sínum tíma. Þessar upplýsingar framreiknuðu þeir til dagsins í dag, með tilliti til fólksfjölgunar, ferðalaga og aðgangs að læknisþjónustu. Niðurstöðurnar voru á bilinu 51-81milljón dauðsfalla og af því tóku þeir hófsamt meðaltal og áætluðu að 62 milljónir manna myndu látast. 96% þessara dauðsfalla yrðu í þróunarlöndunum.