Reynir aftur við nektargöngu

Einn frægasti strípalingur Bretlandseyja, Stephen Gough, sem reyndi fyrir rúmu ári að ganga nakinn frá syðsta odda Bretlands til þess nyrsta, hefur aftur komist í fréttirnar. Hann hyggst nú reyna í annað sinn að fara þessa 1400 kílómetra leið og þetta sinn með kærustu sinni. Gough var handtekinn alls fjórtán sinnum fyrir að rjúfa frið og fyrir að valda umferðaröngþveiti á nektargöngu sinni í fyrra og hitteðfyrra og þurfti hann m.a. að dúsa í fangelsi í fimm mánuði vegna uppátækisins. Með göngunni vilja Gough og kærastan fagna því að þau séu mannverur og vinna gegn spéhræðslu. Gough hefur bent á að engin lög í Bretlandi banni fólki að ganga um nakið svo framarlega sem það geri ekki öðrum mein, en það hafi hann hann ekki í hyggju.