Frakkar sakna frankans

Þrír af hverjum fimm Frökkum sakna frankans, gjaldmiðilsins sem evran leysti af hólmi fyrir þremur árum. Þetta er niðurstaða skoðanakönnunar sem gerð var fyrir franska tímaritið Valeurs Actuelles og undirstrikar frekar afstöðu margra Frakka til samstarfs innan Evrópusambandsins, en eins og kunnugt er felldu Frakkar stjórnarskrá sambandsins í þjóðaratkvæðagreiðslu á dögunum. Frakkar bætast með þessu í hóp Evrópusambandsríkja sem hafa efasemdir um gjaldmiðilssamstarfið, en skoðanakönnun þýska blaðsins Stern fyrr á árinu leiddi í ljós að 56 prósent Þjóðverja vildu taka markið upp aftur í stað evrunnar. Þá hefur Norðurbandalagið, sem á aðild að ríkisstjórn Ítalíu, lagt til að evran verði látin víkja fyrir lírunni til þess að auka samkeppnishæfni landsins.