Fundu frænku jarðar

Frænka jarðarinnar er fundin. Pláneta, sem líkist jörðinni mjög, hefur fundist og það alls ekki langt frá sólkerfi okkar. Vísindamenn hafa árum saman leitað að plánetum sem líkjast jörðinni eða þar sem líf gæti með einhverju móti þrifist. Hingað til hafa allar plánetur af þessu tagi reynst gríðarlega langt í burtu og þannig að ólíklegt er talið að þar geti nokkuð lifað. En nú ber svo við að vísindamenn hafa fundið plánetu sem er aðeins fimmtán ljósár í burtu frá sólkerfinu okkar. Plánetan er á sporbaug um sólina Glíse 876, er talin úr steini og um sjö og hálfu sinni þyngri en jörðin. Vísindamenn segja hana stóru frænku jarðar. Hún snýst gríðarhratt um sólina, þarf aðeins tæpa tvo sólarhringa fyrir hringferð, sem tekur eins og flestir vita ár fyrir jörðina. Sólin Glíse 876 er köld sól miðað við okkar en þar sem plánetan er mun nærri Glíse en jörðin er sólinni er talið að yfirborðshiti á þessari náskildu plánetu sé um 200 gráður á Selsíus. Líkur á því að líf finnist þar eru því taldar fremur litlar en vísindamenn segja fundinn engu að síður benda sterklega til þess að plánetur séu til þar sem líf getur þrifist líkt og á jörðinni.