Segir Bandaríkjaher ljúga

Blaðakonan Guiliana Sgrena segir söguna af björgun sinni úr höndum mannræningja í ítölsku dagblaði í dag. Hún segir bandarísku hermennina sem skutu á bílinn sem flutti hana í frelsið, ekki hafa gefið neinar viðvaranir. Blaðakonan Giuliana Sgrena hafði verið í haldi mannræningja í Írak í um mánuð þegar ítalskur leyniþjónustumaður, Nicola Calipari, fékk hana lausa. Þegar keyrt var með Sgrena í átt að flugvelli hófu bandarískir hermenn að skjóta á bílinn með þeim afleiðingum að Sgrena særðist en Calipari lést. Líkið af hinum fimmtíu og eins árs gamla Nicola Calipari var flutt til Ítalíu í snemma í morgun og var tekið á móti því með viðhöfn. Enn er óljóst hvað nákvæmlega gerðist aðfararnótt laugardags þegar skotið var á bílinn. Bandaríkjaher segir að bíllinn hafi nálgast vegatálma á ógnarhraða og ekki sinnt viðvörunarmerkjum. Því hafi verið ákveðið að skjóta. Giuliana Sgrena segir að ekki hafi verið mikil ferð á bílnum. Í frásögn í dagblaðinu Il Manifesto, sem hún vinnur hjá, segist hún hafa fyllst bæði hamingju og óróa þegar mannræningjarnir samþykktu að láta hana lausa, þar sem líklegt var að ferðin heim yrði mikil hættuför. Hún segir að mannræningjarnir hafi sagt henni að fara varlega þar sem til væru Bandaríkjamenn sem ekki vildu hana aftur. Þessi orð endurómi nú í huga hennar eftir árásina á bílinn. Hún segir að þegar hún hafi komið inn í bílinn hafi Nicola Calipari tekið bindið frá augum hennar og hresst hana við með vinalegum athugasemdum og bröndurum. Hún segir hann hafa setið við hlið sér. Bílstjórinn hafi rætt tvisvar við sendiráðið og ítölsk stjórnvöld um að þau væru á leið á flugvöllinn, leið sem væri vörðuð bandarískum hersveitum. Skyndilega hafi skothríð hafist. Bílstjórinn hafi hrópað út um gluggann að þau væru Ítalir. Hún segir að Calipari hafi lagst ofan á hana til að vernda hana og nánast strax hafi hún fundið hann taka sinn síðasta andardrátt og hann hafi látist ofan á henni. Meira vildi hún ekki segja og sagði framhaldið bíða betri tíma. Á Ítalíu er litið á Calipari, björgunarmann hennar, sem mikla hetju, og hefur hann fengið æðstu orðu stjórnvalda fyrir hugrekki og gata í Róm hefur þegar verið nefnd eftir honum. Þótt Bandaríkjaforseti hafi heitið opinberri rannsókn á því sem gerðist er líklegt að atvikið hafi mikil pólitísk áhrif á Ítalíu þar sem andstaða við Íraksstríðið og þá ákvörðun ítalskra stjórnvalda að senda 3000 hermenn til Írak fer vaxandi.