Órói vegna veru Ísraela

Það kemst enginn friður á í borgum Palestínumanna á Vesturbakkanum fyrr en Ísraelar fara þaðan með herlið sitt, sagði Mahmoud Abbas, forseti palestínsku heimastjórnarinnar. Abbas hvatti Ísraela til að hefja aftur viðræður um brotthvarf hersveita sinna frá fimm borgum á Vesturbakkanum. Ísraelar hættu þátttöku í viðræðunum eftir sjálfsmorðssprengjuárás í Tel Aviv um síðustu helgi. Ísraelar segjast ekki taka nokkurn þátt í viðræðunum fyrr en Palestínumenn finna þá sem stóðu að árásinni og koma lögum yfir þá. Embættismenn hafa sakað Abbas um að fara sér hægt í að handsama mennina sem bera ábyrgð á dauða fimm Ísraela.