Græddu hendur aftur á mann

Bandarískum læknum tókst á ævintýralegan hátt að græða hendur á mann, sem missti þær í vinnuslysi. Arsenio Matias er tæplega fimmtugur fjölskyldumaður og vinnur hjá plastframleiðslufyrirtæki. Hann var viss um að hann myndi deyja þegar hann festi báðar hendurnar í pressu. Hann hafi séð hendurnar á gólfinu og hugsað: „Lífi mínu er lokið.“ Fimmtíu sérfræðingar tóku þátt í að bjarga höndunum á Matias. Aðgerðin var afar flókin og tók ellefu klukkustundir. Alexander Dagum, einn skurðlæknanna, segir að saumurinn sé afar fínn og að þráðurinn sem notaður hafi verið sjáist varla nema í smásjá, en hann sé notaður til að tengja bæði örsmáar æðar og slagæðar. Læknar segja að aðgerðin hafi tekist vel vegna þess að báðar hendurnar hafi verið heilar, bein voru óbrotin og skurðurinn beinn og skarpur við úlnliðinn. Dagum segir að það sé gefandi að græða líkamshluta aftur á mann því tekið sé líffæri sem sé bókastaflega dautt og það vakið til lífsins. Fram undan er löng og ströng endurhæfing ásamt fleiri aðgerðum og hætta er á sýkingum en læknar gera sér vonir um að Matias fái að minnsta kosti 50 prósenta hreyfingigetu í hvora hönd.