Jarðskjálftar í Tyrklandi

Tveir öflugir jarðskjálftar skóku borgina Izmir í vesturhluta Tyrklands í morgun. Sá fyrri mældist 5,7 stig á Richter og sá síðari 5,9 stig á Richter. Ekki hafa borist fregnir af manntjóni eða eyðileggingu, en fólk þusti út á götur borgarinnar í mikilli skelfingu. Skjálftarnir fundust víðsvegar í vesturhluta Tyrklands og á eyjum úti fyrir ströndum landsins. Tyrkland liggur á flekaskilum og því eru minniháttar jarðskjálftar algengir. Stærsti skjálftinn á undanförnum árum var árið 1999 en sá mældist 7,4 á Richter og varð yfir sautján þúsund manns að bana.