Hafði betur í baráttu við hákarl

Fertugur fjölskyldufaðir slapp á undraverðan hátt þegar ríflega fjögurra metra langur hvítháfur réðst á hann úti fyrir ströndum Sydney í Ástralíu. Maðurinn, sem hafði verið að fagna feðradeginum með tveimur börnum sínum á ströndinni, var á brimbretti þegar hárkarlinn lét til skarar skríða. Við það féll maðurinn af brettinu og dróst á kaf þar sem hann var bundinn við það. Þegar hákarlinn hafði bitið brettið í tvennt réðst hann að manninum sem tókst að forðast kjaft dýrsins með höggum og spörkum og komast á land við illan leik. Dýrið náði engu að síður að glefsa í hann og var hann fluttur á spítala þar sem gert var að sárum á annarri hendi og læri.