Fjórir Svíar reknir út af hóteli

Fjórum sænskum ríkisborgurum var kastað út af hóteli í Árósum í Danmörku vegna gruns um hryðjuverk. Mennirnir segjast hafa komið til borgarinnar til að sjá stjörnurnar í knattspyrnuliðinu Barcelona leika við heimamenn. Svíarnir fjórir eiga það sameiginlegt að vera dökkir á hörund og ekki af norrænum uppruna. Hótelstjóranum fannst grunsamlegt að þeir skyldu panta herbergi aðeins hálftíma fyrir komu sína, þeir hafi ekki haft mikinn farangur með, hafi ekki verið búnir að tryggja sér miða á fótboltaleik FC Barcelona og heimamanna í AFG, auk þess sem einn þeirra hafi notað neyðarútgang á hótelinu, sem sé bannað nema í neyð. Tveir lögregluþjónar knúðu dyra á herbergi mannanna og vísaði þeim á dyr, að beiðni hótelstjórans. Ákvörðuin vakti reiði hjá liðsmönnum Barcelona sem dvöldu einnig á hótelinu, og neituðu þeir að taka þátt í skipulagðri uppákomu þann daginn, þar sem þeir áttu að veita áhangendum eiginhandaáritanir. Danir eru með þykkari skráp en áður gagnvart hryðjuverkaógn, skrifar Jyllands Posten í morgun, og hefur eftir talsmanni danskra ferðaskrifstofa. Hann segir eina milljón ferðir verða farnir frá Danmörku til 25 landa sem utanríkisráðuneytið varar við vegna hættu á hryðjuverkaárásum. Eftir árásirnar í Egyptalandi á dögunum lék vafi á því hver ætti að greiða kostnað við heimferð danskra ferðamanna. Sölustjóri ferðaskrifstofunnar Star Tours segir við blaðið MetroXpress í morgun að ferðamálageirinn eigi að koma upp sínum eigin neyðarsjóði, sem geti borgað fyrir heimferðir og aðra neyðarhjálp frá hættusvæðum. Hans hugmynd er að fjármagna sjóðinn með því að leggja því sem nemur fimmtíu íslenskum krónum við miðaverð. Í umræðu um hryðjuverk er oft rætt um Kóraninn, en talsmenn Biblíunnar koma sínum boðskap einnig á framfæri. Þannig sagði fulltrúi frá vottum Jehóva, sem knúði dyra hjá fréttamanni í morgun, að Guð væri sá eini sem gæti bjargað heiminum, manneskjan hefði fengið mýmörg tækifæri til þess – án árangurs.