Langvarandi þurrkar í Suður-Evrópu

Langvarandi þurrkarr valda vaxandi vandræðum í Evrópu. Steikjandi hiti gerir illt verra, og óttast er að þetta geti valdið mannskaða líkt og fyrir tveimur árum, þegar tugþúsundir fórust. Skógareldar valda nú miklu tjóni og mannskaða á Spáni og í Portúgal, þar sem rignt hefur minna í sumar en frá því á fimmta áratug síðustu aldar. Ástandið er ekki mikið betra í Frakklandi, þar sem hitabylgja veldur vandræðum. Spáð er enn hækkandi hita þar og hafa yfirvöld séð ástæðu til að grípa til aðgerða til verndar eldra fólki sem þolir ills þennan mikla hita. Svipaða sögu er að segja frá Spáni, Portúgal og Ítalíu. Til að bæta gráu ofan á svart hefur þurrkurinn valdið því að vatnsbirgðir eru í algjöru lágmarki og hafa ekki verið minni í Frakklandi frá því 1976. Ken Livingston, borgarstjóri Lundúna, hefur beðið samborgara sína að sturta ekki alltaf niður þegar þeir bregða sér á salernið, þar sem vatnskortur er líka vandamál á Bretlandi. Akrar og gróðurlendi eru eins og eldspýtnabox, skraufþurr og sviðin. Í suður-Frakklandi ógna engissprettur uppskerunni, en það er vandi sem betur er þekktur hundruðum kílómetra sunnar, í Afríku. Sérfræðingar segja allt stefna í að ástandið verði á næstunni verra en sumarið 2003, þegar þurrkar og hitabylgja kostuðu meðal annars fimmtán þúsund manns lífið í Frakklandi.