Viðhorf múslima jákvæðara en áður

Hryðjuverk gagnvart bandarískum hermönnum í Írak eru réttlætanleg að mati helmings múslima í Jórdaníu og Líbanon. Þrátt fyrir það er viðhorf þeirra til vestrænna þjóða mun jákvæðara í dag en áður. Mun fleiri múslimar hafa jákvætt viðhorf gagnvart vestrænum löndum í dag en fyrir ári síðan. Þetta kemur fram í könnun sem gerð var fyrir rannsóknarfyrirtækið Pew Center, fyrir sprengingarnar í London í síðustu viku. Rannsóknin var gerð í 17 löndum þar sem meirihluti íbúa eru múslimar. Í rannsókninni kemur fram að múslimar hafi í sífellt auknum mæli áhyggjur af hryðjuverkum, bæði í heimalöndum og annars staðar, og hafa múslimar jafnframt áhyggjur af ímynd sinni í vestrænum löndum, þó síst í Bretlandi, Bandaríkjunum og í Kanada. Sú afstaða gæti þó hafa breyst. Viðhorf múslima til vestrænna landa og gilda eru jákvæðust í Marokkó, Tyrklandi og Indónesíu. Í þessum löndum sagði meirihluti fólks að hryðjuverk væru í engum tilfellum réttlætanlegt. Helmingur múslima sem tók þátt í könnuninni í Jórdaníu og í Líbanon sagði þó að sjálfsmorðssprengjuárásir gagnvart bandarískum hermönnum í Írak gætu í sumum tilfellum verið réttlætanlegar. Ekki virðist sem mönnum komi saman um ástæður hryðjuverka en í Líbanon og Jórdaníu segir fólk ástæðurnar vegna stefnu Bandaríkjanna í utanríkismálum. Íbúar Marokkó og Pakistans segja fátækt ástæðuna, menntunarleysi og vonleysi. Tyrkir kenna fáfræði um á meðan aðrir aðrir segja hreina illsku líklega helstu ástæðuna. Múslimar viðurkenna almennt að þeir eigi erfitt með að aðlaga sig þeim vestrænu þjóðfélögum sem þeir flytjast til. Múslimar eru á einu máli um að ríki þeirra eigi að ráða meiru í alþjóðasamfélaginu, íslam sé ein útbreiddasta trú veraldar og því eðlilegt að hún hafi meira vægi. Fordómar gagnvart múslimum eru miklir í Evrópu að þeim finnst og vilja þeir bæta ímynd sína. Ekki er laust við að múslimar hafi þó sjálfir fordóma en nánast 100 prósent aðspurðra í Líbanon og í Jórdaníu kváðust ekki líka við gyðinga. Það er vandlifað í þessum heimi og ljóst að mikið verk er framundan; að eyða, eða í það minnsta minnka, fordóma ólíkra hópa gegn hver öðrum.