Geimskoti frestað

Hætt hefur verið við að skjóta geimferjunni Discovery á loft frá Flórída en áhöfnin var komin um borð og tilbúin að leggja í hann þegar ákvörðunin var tekin nú fyrr í kvöld. Mikil spenna var við Canaveral-höfða, en þúsundir ferðamanna voru þar saman komnir til að fylgjast með atburðinum. Geimferjunni átti að skjóta á loft klukkan korter í átta í kvöld að íslenskum tíma þrátt fyrir að í gærkvöld hafi plasthlíf fallið 20 metra úr glugga geimferjunnar og skemmt hitahlíf yfir siglingatækjum ferjunnar. Verkfræðingar Nasa sögðu þó málið smávægilegt og flaugin væri tilbúin til brottfarar. Bilun í eldsneytiskerfi flaugarinnar var ástæða þess að hætt var við geimskotið en allir sjö áhafnarmeðlimir voru komnir um borð. Ekki hefur verið ákveðið hvenær flaugin fer í ferð sína út í geiminn en það verður þó fyrsta geimferjuferðin sem farin er frá Flórída frá því geimferjan Kólumbía fórst skömmu fyrir áætlaða lendingu í febrúar árið 2003. Ferð Discovery er heitið til Alþjóðlegu geimstöðvarinnar og er gert ráð fyrir að hún muni standi í 12 daga. Þúsundir ferðamanna höfðu safnast saman við brottfararstaðinn og komu hörðustu aðdáendurnir í gær til að fylgjast með þessum merka atburði en svo virðist sem þeir hafi farið fýluferð í þetta sinn.